විශ්වාසභංගයෙන් පැරදුණු ස්පාඤ්ඤ අගමැති

පසුගිය ජුනි 1 වන දින විශ්වාසභංගය පිළිබද ස්පාඤ්ඤයේ පාර්ලිමේන්තුව තුල පැවති ජන්ද විමසීමෙන් අගමැති මරියානෝ රජෝයි පරාජයට පත් විය. ඒ අනුව මෑත ඉතිහාසය තුල ස්පාඤ්ඤයේ විශ්වාසභංගයකින් පරාජයට පත් වූ පළමු අගමැතිවරයා ලෙස රයෝයි ඉතිහාසයට එක් වෙයි.

මෙලෙස මරියානෝ රයෝයිට එරෙහිව විශ්වාසභංගයක් ඉදිරිපත් වුයේ ඔහු නායකත්වය දැරූ මහජන පක්ෂය සම්බන්ධයෙන් දුෂණ චෝදනා මතුවීමයි. විශාල වශයෙන් අල්ලස් ලබා ගැනීම, හිතවත් පාර්ශව වෙත රජයේ කොන්ත්‍රාත් ලබා දීම ආදී චෝදනා කලක සිටම මෙම පක්ෂයට එල්ල විය. මෙලෙස දුෂණ චෝදනා එල්ල වෙත්දීත් මෙම ක්‍රියා වැලැක්වීම සදහා රජෝයි නිසි පියවර නොගැනීම මත ඔහුට විශ්වාසභංගයක් ඉදිරිපත් විය. විශ්වාසභංගයට පක්ෂව මන්ත්‍රීවරුන් 180  දෙනෙකු ජන්දය ලබා දුන් අතර විරුද්ධව ලැබුනේ ජන්ද 169කි.

මරියානෝ රජෝයි ස්පාඤ්ඤයේ අගමැති බවට පත් වුයේ 2011 වසරේදීය.මීට පෙරද කිහිප වරක් රයෝයිට අගමැති ධුරයෙන් ඉල්ලා අස්වෙන ලෙස බලපෑම් එල්ල විය. එසේම මීට පෙර ඔහුට විරුද්ධව එක් විශ්වාසභංගයක් ඉදිරිපත් වූ අතර එයින් ජයගැනීමට ඔහුට හැකි විය. නමුත් මෙවර තරුණ නායකයෙකු වන 46 හැවිරිදි පෙද්රෝ සන්චේස් පක්ෂ කිහිපයක් ඒකරාශී කරගනිමින් රජෝයිව පරාජය කිරීමට සමත් විය. විශ්වාසභංගයෙන් පරාජයට පත් වීමෙන් පසු රයිනෝ තමාට එරෙහිව විශ්වාසභංගය ඉදිරිපත් කල පෙද්රෝ සන්චේස්ට අතට අත දී සුභ පැතු අතර ස්පාඤ්ඤයේ අගමැති ලෙස කටයුතු කිරීමට හැකි වීම ගෞරවයක් ලෙස සලකන බවද ,තමා රට බාර ගනිත්දී තිබුනාට වඩා යහපත් රටක් ඉතිරි කර යාමට හැකිවීම පිලිබදව තමා සතුටු වන බවද ඔහු  පාර්ලිමේන්තුව අමතා කිවේය. කෙසේ වුවත් අගමැති ධුරයෙන් සමුගෙන ඔහු පාර්ලිමේන්තුවෙන් පිටවෙත්දී රැස්ව සිටි පිරිස ‘හු’ හඩ නගමින් තම අප්‍රසාදය පල කර තිබේ.

රජෝයිගෙන් පසුව එරට අගමැති ධුරයට පත් වුයේ විශ්වාසභංගය ද ඉදිරිපත් කිරීමට මුල් වූ සමාජවාදී කම්කරු පක්ෂයේ නායක පෙද්රෝ සැන්චේස් ය. දැන් සියලු දෙනාම බලා සිටින්නේ නව අගමැතිවරයා ස්පාඤ්ඤය තුල කුමන වෙනස්කම් සිදුකරයිද යන්නයි.

මේ අතර නව අගමැතිවරයාට මුහුණ දීමට සිදුවන ලොකුම ගැටලුව වන්නේ කැටලෝනියා නිදහස් අරගලයයි.මෙය කාලයක සිටම ඇදෙමින් පවතින ගැටළුවකි. කැටලෝනියාව යනු ස්පාඤ්ඤය සෑදී ඇති ප්‍රාන්ත හා සමාන ඒකක වලින් එකක් වන අතර එය ස්පාඤ්ඤයෙන් වෙන් කර වෙනම රාජ්‍යයක් බවට පත් කිරීම සදහා බෙදුම්වාදී පක්ෂ කිහිපයක් කලක සිට අරගල කරමින් සිටී. නමුත් විශ්වසභාන්ගයෙන් පැරදුනු හිටපු අගමැති රයිනෝ මෙම අරගලය ඉතාමත් දැඩි ලෙස මර්දනය කළේය. මෙම අරගලයට සම්බන්ධ බොහෝ දෙනෙක් මධ්‍යම රජයට එරෙහිව කැරලි ගැසීමේ චෝදනා මත සිරගත කල අතර තවත් පිරිසක් මෙම චෝදනාවෙන් බේරීමට රටින් පලා ගියේය. නමුත් මෙම අරගලය තවමත් ඉදිරියට යයි. දැන් එරට ජනතාව බලා සිටින්නේ නව අගමැති මේ සම්බන්ධයෙන් කවර ආකල්පයකින් ක්‍රියා කරනු ඇත්ද යන්නයි.